Tetesan Kata "Berijin Ama Ine"

"Serilah ulung ni belo serecak uwah ni pinang sekulah beloh muranto pantang ulak sebelum menang"

BERIJIN AMA INE

Karya: Usman Kari

rakan sebet taon bermenye

Ini sara cerite ku rike

Kucak ke kire nge berkaol konote kire nge bernaru

Genap kire ken penemah ni langkahku

Salam semah ku buge kire gere ne naru

Salam mulie sepuluh jejariku

Gelah Tirus e lagu gelas bulette kire lagu umut

Berijin seringkel rela turah ku sebut

Ike lebehe kire gelah bejemput

Ike benewe kire gelah besaput

Timul kekire ulu petungkuk

Bene ni karu kire enti ne gabuk

Ate mungune hana die keber ni ama ine

Anak mu mukale ken tanoh rembege

Kene ama ine seber gelah beberet murip turah bertenege

Ari kena dele nge heme iatan Denie

Nge muloi lale nge timul menye

Buge ini ken bertih wan kenduri penawar ken rembege

Nguk ken penemah ni langkah tabi ku ama ine

Nge nyanya kire kunul semile

Berakah I joyah sene I telege

Rupen nge magrib isi ni Denie

Hana keti lale di ku engon kite

Woo rakan sebet semah si mulie bahgie

Kami sabe muninget urum galak ni gegure

Lagu pucuk ni rom kemel muleme gegebe

Nge dele tu lompong muhasil mi kire ken buge

Uyem mutalu urum laoh muderu

Atengku mukale denem sabe ken sebuku

Buge salupi emun si ken penemah ni kuyu

Lut tawar nge ken penurip ni urangku

Remuk ni ate nge timul sebuku

jejari sepuluh ken pelengkap ni kumu

Semah sujud mulie ken ama ine ku

Ari kucak sawah besilo si nge mungaul ni aku

Berijin ama ine ku ken jerih payah mu

Si nge beporak Uren ken tudung mu

Buge ken tuah mi kire rembege harapanmu

Berijin, berijin, berijin, ama ine ku

Banda Aceh, 30 Mei 2014